منزله الصلاه في الاسلام وحكم تاركها _الاسلام ديني وحياتي

السلام عليكم ورحمة الله,,,

بسم الله والصلاة والسلام على خير خلق الله,,,

النهاردة هنبدأ كلام عن الصلاة وبالتحديد عن منزلتها فى الاسلام وحكم تاركها,,,

* منزلة الصلاة فى الاسلام =>

الصلاة هى عماد الدين الذى لا يقوم الا به ، وهى أول ما أوجبه الله تعالى على عباده من العبادات ، وربنا عز وجل خاطب بيها الرسول الأمين فى رحلة الإسراء والمعراج بدون واسطة ، وهى أول حاجة العبد هيتحاسب عليها يوم القيامة ، وكمان هى آخر حاجة وصى رسولنا الكريم بها عند مفارقته الدنيا ، والدليل على الكلام ده الأحاديث القادمة,,,

قال رسول الله_صلى الله عليه وسلم_: " رأس الأمر الإسلام ، وعموده الصلاة ، وذروه سنامه الجهاد فى سبيل الله "

وقال أنس رضى الله عنه " فرضت الصلاة على النبى_صلى الله عليه وسلم_ليلة أسرى به خمسين ، ثم نقصت حتى جعلت خمسا ، ثم نودى يا محمد : إنه لا يبدل القول لدى ، وإن لك بهذه الخمس خمسين "

وقال رسول الله_صلى الله عليه وسلم_: " أول ما يحاسب عليه العبد يوم القيامة الصلاة ، فإن صلحت صلح سائر عمله ، وإن فسدت فسد سائر عمله "

وقال حبيب الرحمن وهو يلفظ أنفاسه الأخيرة " الصلاة الصلاة ، وما ملكت أيمانكم " ، وده طبعا فضلا عن وجوبها فى العديد من آيات الذكر الحكيم

------------------------------------------

حكم ترك الصلاة =>

ترك الصلاة جحودا بها وإنكارا لها يعد كفر وخروج عن ملة الإسلام بإجماع المسلمين ، أما من تركها مع إيمانه بها واعتقاده فرضيتها ، ولكن تركها متكاسلا أو تشاغلا عنها ، بما لا يعد فى الشرع عذرا فقد صرحت الأحاديث بكفره ووجوب قتله ، وذلك على النحو التالى,,,

* فعن جابر_رضى الله عنه_قال : قال رسول الله_صلى الله عليه وسلم_" بين الرجل وبين الكفر ترك الصلاة "

* وعن بريدة قال : قال رسول الله_صلى الله عليه وسلم_" العهد الذى بيننا وبينهم الصلاة ، فمن تركها فقد كفر "

* وعن عبد الله بن عمرو بن العاص_رضى الله عنهما_عن النبى_صلى الله عليه وسلم_ أنه ذكر الصلاة يوما فقال : " من حافظ عليها كانت له نورا وبرهانا ونجاة يوم القيامة ، ومن لم يحافظ عليها لم تكن له نورا ولا برهانا ولا نجاة ، وكان يوم القيامة مع قارون ، وفرعون وهامان وأبى بن خلف "

* وجاء عن عمر بن الخطاب ، وعبد الرحمن بن عوف ، ومعاذ بن جبل ، وأبى هريرة وغيرهم من الصحابة الكرام_رضى الله عنهم أجمعين_ : " أن من ترك صلاة فرض واحدة متعمدا حتى يخرج وقتها فهو كافر مرتد "

* وعن ابن عباس عن النبى_صلى الله عليه وسلم_ قال : " عرى الاسلام وقواعد الدين ثلاثة ، عليهن أسس الاسلام ، ومن ترك واحدة منهن فهو بها كافر حلال الدم : شهادة أن لا اله الا الله ، والصلاة المكتوبة ، وصوم رمضان "

الموضوع كبير يا جماعة بجد ، لازم نعيد حساباتنا فى الصلاة ، مابين الى بيضيعها والى بيتشغل عنها والى بيأخرها لآخر اليوم ، كل ده فى استهتار مننا احنا مش حاسين بيه ،

وبلاش حد يقول أصل أنا بذنب كتير والصلاة هتخلينى مقيد ،  أو أنا مش هعرف أصلى وفى نفس الوقت بشرب سجاير او بعاكس او بشتم ، وبنت تقول مش هعرف أصلى وانا بلبس ضيق أو وانا كاشفة شعرى,,,,

كل دى مسالك للشيطان بيدخلنا منها علشان يلهينا عن ربنا وعن طريق الهداية ، حتى لو بنعمل كدة " مع انه مش صح "  بس لازم نصلى برده ، وكون ان ربنا شايفك بتحرص على الصلاة فى ميعادها وفى المسجد ، اكيد مش هيسيبك لوحدك وهينجيك من المعاصى والذنوب ، بس فعلا تكون عايز ان ربنا ينجيك وتاخد القرار بالصلاة والانتظام فيها وتأديها فى وقتها ، وخلينا فاكرين ان مع بداية حرصنا على صلاتنا وتوبة نصوحة لله ، ربنا هيغفرلنا " إن الله لا يغفر أن يشرك به ويغفر ما دون ذلك لمن يشاء "

واوعى تنسى انك لما هتتوب ربنا هيفرح بتوبتك ويقربك منه ، وبعيدا عن الفرض يا أخى ده انت لو هتصلى لربنا علشان بس تشكره على النعم الى انت فيها مش هيكفى صلاة عمرنا كله شكر لله ! تقوم تسيبها وهى فرض ؟!

وبلاش طول الأمل وتقول انا لسة صغير ولما أكبر شوية هلتزم ، لو ده تفكيرك,, قولى مين ضمن عمره ؟ الموت ملهوش سن معين وبيجى فجأة ، ساعتها هيبقى ايه وضعنا ؟ لما نقف قدام ربنا وأول حاجة يسألنا عنها نكون مضيعنها ؟

وفى بداية صلاتك وانتظامك ممكن الشيطان يلهيك اثناء الصلاة وماتحسش بخشوع ، مش مشكلة ابدأ انت بس واستمر وخلى ذكر ربنا على لسانك دايما ، هتلاقى ربنا ساعدك ان شاء الله .

اللهم اجعلنا من مقيمين الصلاة فى أوقاتها أبدا ما أحييتنا

اللهم لا تجعلنا من الغافلين عنها

صلوا على النبى :)